සංචාරක ශ්‍රි ලංකා කණ්ඩායම හා ඉන්දීය කණ්ඩායම අතර දෙවන ටෙස්ට් තරගය හෙට දිනයේදී ආරම්භ වීමට නියමිතය. දිවා රාත්‍රී ටෙස්ට් තරගයක් ලෙසින් පැවැත්වෙන මෙම තරගයට ශ්‍රි ලංකා පිතිකරු පැතුම් නිස්සංකගේ සහභාගිත්වය අවිනිශ්චිත බවට වාර්තා වෙයි. පුහුණුවීම් අතරතුර ආබාධයකට ලක්වීම හේතුවෙන් පැතුම්ට දෙවන තරගය අහිමි වීමේ වැඩි ඉඩක් පවතින බවද ශ්‍රි ලංකා ක්‍රිකට් ඉහළපෙළේ ආරංචිමාර්ග සදහන් කොට ඇත.
” ඔහු පුහුණුවීම් සදහා ක්‍රීඩාංගණයට ගියා. නමුත් ඔහු පන්දුවට පහර දුන්නේ නෑ. ඔහු අඛණ්ඩව තරග ගනණාවක් ක්‍රීඩා කළා. ඔහු දෙවන තරගයට ක්‍රීඩා කරනවාද යන්න සිකුරාදා දිනයේදී තීරණය කරනවා. ගොඩක් දුරට ඔහුව දෙවන තරගයෙන් විවේක ගන්වයි. ” යනුවෙන් ශ්‍රි ලංකා ක්‍රිකට් ඉහළපෙළේ ආරංචිමාර්ග සදහන් කොට ඇත.
පැතුම් නිස්සංක දෙවන ටෙස්ට් තරගයට ක්‍රීඩා නොකළහොත් ඔහු වෙනුවට කුසල් මෙන්ඩිස් ශ්‍රි ලංකා කණ්ඩායමට කැදවීමේ වැඩි ඉඩක් පවතින බවද සදහන්ය. එමෙන්ම ශ්‍රි ලංකා ජාතික ක්‍රිකට් කණ්ඩායමේ පන්දු රැකීමේ පුහුණුකරු ලෙසින් ඇන්ටන් රොක්ස් පත් කොට ඇත. ඔහු මින් පෙර නෙදර්ලන්ත ජාතික ක්‍රිකට් කණ්ඩායමේ ප්‍රධාන පුහුණුකරු ලෙසින් කටයුතු කොට ඇත.